Amr

في عهد سيادة الرئيس المنتخب ديموقراطيا

في أمريكا مقولة تستخدم في وصف موسم الحملات الإنتخابية

Campaigns are defined by the incumbent whether he’s running or not

“الحملات الإنتخابية تتأثر بالرئيس الحاكم سواء كان مرشحا أم لا”. الرئيس الحالي يحدد إذا ما كان المرشحين هيعرضوا نفسهم كأستكمال للرئيس الحالي أم إنهم تغيير.

في مصر، وفي الإنتخابات القادمة ، الحال ليس مختلفا إلا من فارق واحد بسيط، الرئيس الحالي هو المجلس العسكري والشعب المصري علي مدار سنة كاملة خلي الأمور واضحة جدا إنه عايز تغيير. زي ما بهية بتقول إن الإنتخابات بين جبهتين: حكم القلة (إستمرار النظام القديم) والديموقراطية (إستمرار الثورة). ممكن تحاول إنك تدور علي دليل إزاي كل واحد من المرشحين كان من الثوار ولا من الفلول لكن الدليل الأقوي (رغم إنه ليس دليلا ماديا) هو موقف الرئيس القادم من المجلس العسكري (دولة العسكر وليس الجيش) وموقف المجلس العسكري منه.

نبدأ بعمرو موسي اللي بيعرض نفسه علي إنه كان معارض لمبارك لكن بشكل أكبر بيعرض نفسه علي إنه رجل دولة وإنه جاهز للمهمة من اليوم الأول وإنه قوي وصارم ويعرف يدير الأمور. موسي لن يبحث عن مواجهات مع أحد وسيسعي إنه يحقق نجاحات إقتصادية يعرضها للشعب علي إنها ثمار عهد جديد (وهي مهمة مش صعبة أوي .. فيه ناس كتيرة ممكن التضحية بيها علي إنها رموز الفساد مثلا). الديموقراطية لن تحقق تقدم في عهد موسي لأن المشكلة التي يسعي لحلها هي النهب والتخلف والتأخر وليس الديكتاتورية. كل ديه حاجات لا تتعارض مع أهداف المجلس العسكري اللي مستعد يتقبل خسائر ويقدم تنازلات قبولا بالأمر الواقع إنه حصلت ثورة في مصر وإن سيناريو التوريث إنتهي بدون إنقلاب عسكري واضح. الصراع بين موسي والإخوان سيؤدي إلي إستمالة المجلس العسكري لموسي حتي يستقوي بهم. وإتفاق موسي والإخوان يعني نهاية الثورة بشكل واضح. العسكر هيحاولوا يبقي فيه مواجهة بين موسي والإخوان لكنها مواجهة محدودة بحيث يظل الطرفين متواجهين وليسوا متفقين فيظل العسكر هم عصا موسي في مواجهة الإخوان وكذلك يكونوا وكيل أي إتفاق بينهم. البلاد ستشهد إستقرار أمني شبه فوري وقروض خارجية وتسهيلات تجعل حل الأزمة الإقتصادية ممكنة وإستمرار لإعلام مبارك وجهازه الإداري في الدولة ورفع موسي لشعار تحقيق أهداف الثورة حتي يصبح بطلها الأول ويمكن الوحيد بعد بضعة سنين في كتب تاريخ الإبتدائي. الطرق بين موسي والعسكر سالكة وكل المطلوب فقط هو إن حد يأخد الرحلة ديه إن لم تكن القوافل رايحة جاية بالفعل.

أبوالفتوح .. إنسحاب البرادعي هو الذي جعل أبوالفتوح من أقوي المرشحين في السباق الحالي. ليس فقط لأن الليبرالين والبرادعيين والثوريين بدأوا يبحثوا عن بديل ولكن أيضا لأن أبوالفتوح بدأ يبحث عنهم. إعتدال أبوالفتوح زاد بعد إنسحاب البرادعي أو علي الأقل ظهر ، وبدلا من أن يكون هناك الثوري الليبرالي (البرادعي) والثوري الإسلامي (أبوالفتوح) أصبح هناك الثوري فقط. الحاجة التانية اللي جعلت أبوالفتوح يظهر أكتر وأكتر هو إن إعتداله لم يعد فقط طريقة للوصول لجمهورين مختلفين (الإسلاميين والمدنيين) ولكن أيضا هذا الإعتدال أصبح حل لمشكلة الإستقطاب بين الإسلاميين والمدنيين وهي المشكلة اللي علي مدار سنة وأكتر أثارت خوف الجمهور الأعرض من الشعب المصري وأساءت للثورة وخلت الناس تتقبل جرائم المجلس العسكري المتكررة لأن البديل أصبح ليس مقبولا إطلاقا. إعتدال أبوالفتوح وحتي إستخدامه المباشر لفكرة إنهاء الإستقطاب جعلته بشكل ما يمثل الدولة ، دولة مدنية بمرجعية إسلامية.

أبوالفتوح لا يعتمد علي مؤسسة علي عكس موسي (يعتمد علي الفلول في جهاز الدولة والعسكر) ومرسي (يعتمد علي الإخوان والبرلمان) ، لذلك أبوالفتوح مضمون إنه يظل يعتمد علي ناخبيه ويمكن أكتر لمواجهة هاتين المؤسستين سيكون عليه إنه يعتمد علي الشعب وليس فقط ناخبيه. أول مشكلتين في مواجهة أبوالفتوح هما عدم تنفيذ جهاز الدولة لأوامره (طريقة العسكر في تحجيم أبوالفتوح) وأول مثال لذلك هو إحكام وزارة الداخلية للأمن وثاني مشكلة هي تهميش الرئيس في الدستور سواء مشاركته في كتابة الدستور أو صلاحيات الرئيس في مصر بعد الثورة (طريقة الإخوان في تحجيم أبوالفتوح). رئاسة أبوالفتوح تفتح الباب لإتفاقات بين العسكر والإخوان. السنة الأولي – علي الأقل – من رئاسة أبوالفتوح ستشهد إستقرار من نفس نوعية الإستقرار اللي شهدتها الفترة الإنتقالية. أبوالفتوح أذكي من إنه يبدأ مواجهة ضد العسكر أوالإخوان لكن الضغط الناتج عن عدم تحقيق نتائج لقراراته ستعجل بالمواجهة. رئاسة أبوالفتوح تساعد علي بناء الديموقراطية في مصر ليس فقط لأن ده متناسق مع وعود وأفكار الرجل ولكن لأن إستمالة الشعب وقوي الثورة لجانبه تحتاج لذلك ، مواجهة الدولة العميقة بالمجتمع المدني. أول سلاح في يد أبوالفتوح في مواجهة العسكر هو تحرير الإعلام المصري علي أمل إن إيقاف ألة الكذب المباركي هيفتح الطريق أمام أفراد شرفاء يتطلعون لعمل إعلامي حر. حل الأزمة الإقتصادية زيه زي حل الإنفلات الأمني ستصدر قرارات من الرئاسة ويمر الوقت دون تنفيذها أو يتم التلكأ في تنفيذها وبعدها المواجهة تكون حول إستمالة الشعب المصري حول السؤال “من المسئول عن تأخر الإصلاح؟ الرئيس أم الفلول”. الصلاحيات الإلهية لمبارك وسيطرته الكاملة علي الدولة هتبقي مشكلة في مواجهة أبوالفتوح لأن قناعة الشعب المصري هي إن الرئيس قادر علي حل أي مشكلة في الدولة وإن السبب الوحيد لعدم حل المشاكل هو إنه لم يصدر قرار بذلك.

مشكلة أبوالفتوح مع الإخوان ليست فقط شخصية بينه وبين أفراد في مكتب الإرشاد ولكن ستكون إنه يمثل تيار إسلامي أكثر إعتدالا من الإخوان. فوز أبوالفتوح في الإنتخابات هيفتح الباب أمام شباب كتير من الإخوان إنهم يسيبوا الجماعة ويتجهوا لأبوالفتوح . فيه أسباب كتيرة للإختلاف بين أبوالفتوح والإخوان ولكن فيه سببين أساسين للإتفاق بينهم ، أولا إن الإتنين يمثلوا حكم للتيار الإسلامي وبداية للتجربة الإسلامية في مصر وثانيا حزب النور هيبقي دافع للإتفاق بين الإتنين بحثا عن دور أكبر للحزب.

أبوالفتوح هو مرشح الثورة ، مش علشان هو بيقول كده ولكن لأن الثوار هم ناخبيه وجمهوره و”المؤسسة” اللي بيعتمد عليها في مواجهة العسكر والإخوان.

صباحي .. مفيش قدامه فرصة إنه يكسب. فرصة صباحي إنه يكسب زي فرصة الأحزاب الليبرالية في الحصول علي الأغلبية في البرلمان. قبل الإنتخابات كان الحوار بين تيارين .. الإسلامي والليبرالي .. وتلاقي في كل برنامج النقاش والحوار والجدال بين الطرفين علي إنهم متواجهين أو متساويين بشكل ما .. وبعد الإنتخابات تلاقي إن الأغلبية للإخوان وبعدهم السلفيين. صباحي زي التيار الليبرالي له وزن كبير في الإعلام ومفيش وزن حقيقي في الشارع. كمرشح، صباحي، راجل محترم وثوري وذو مبادئ وأفكار وبرنامج محترم لكن كله ده لا يترجم إلي أصوات. صباحي مرشح ثوري لكنه مرشح وبس للأسف. نفس الكلام ينطبق علي خالد علي اللي ترشحه رمزي أكتر من أي شئ.

السؤال الملح عليا واللي فعلا فعلا مش لاقي له إجابة هو .. إزاي المجلس العسكري ضامن دوره بعد إنتخاب رئيس جديد؟

أطباء نفس نظام مبارك

أولا لازم تتفرج علي الفيديو ده

http://www.youtube.com/watch?v=YE4nL0VDXHU

أنا مش بأحب نظرية المؤامرة .. لكن الأمور في مصر يمكن مختلفة شوية .. الناس في بعض الأحيان تقعد تقولك يا عم مش عايزين الأمور توصل لحرب أهلية .. مش عارف إزاي وصلوا إلي فكرة الحرب الأهلية ديه .. مصر مختلفة عن دول زي ليبيا أو العراق .. مصر دولة مركزية فيها المركزية شديدة جدا والدولة قوية فعلا مقارنة بليبيا اللي أيام القذافي لا كانت دولة ولا كانت مركزية .. ومصر دولة ليس فيها قوي متناحرة متساوية القوي أو متكافئة زي العراق اللي فيها سنة وشيعة وأكراد بشكل متكافئ أو شبه متكافئ وكمان متوزعين بشكل يعمل مناطق أمنة لكل قوة .. مصر مش كده خالص.

مصر فيها إحتكار للقوة .. الدولة المركزية تحتكر القوة تماما .. ده سببه ميراث ثورة الضباط الأحرار اللي طلعت بالعسكر إلي السلطة وده خلي العسكر يتخلصوا من أعدائهم مش بس بالقوة ولكن أيضا بتأمين عدم وصول أخرين إلي أي قوة .. وبعدين في التسعينات لما موضوع الجماعات الإرهابية زاد .. بدأت فترة من إمعان إحتكار القوة .. ورغم إن الشرطة إستغلت الفرصة ديه فيها إنها تشارك في إحتكار القوة مع الجيش إلا إن كل ده يقع تحت مظلة الدولة المركزية.

القوة في مصر اللي تحت سيطرة الدولة المركزية ديه باطشة لا تعرف الرحمة .. الكلمة المناسبة هي “بغشم” .. لا يتم إستخدامها برفق أو بالحجم المناسب ولكن علي طريقة “إضرب المربوط يخاف السايب” .. والسايب عندنا في مصر بيخاف

أي محاولة جادة حقيقية من أي طرف خارج عن السيطرة لتحدي سيطرة الدولة المركزية أو إحتكارها للقوة سيتم مقابلته بغشم .. سيتم مقابلته بقوة ساحقة ماحقة .. وهتلاقي دبابات وطيارات وقوات صاعقة وكله نازل عليك من السما .. علشان السايب يخاف مش بس علشان تضرب المربوط

والأهم إننا إحنا كمصريين نرفض تحدي سيطرة الدولة المركزية أو إحتكارها للقوة .. مش بس لأن “الجيش والشعب إيد واحدة” ولكن كمان لأن إعتراض أغلب المصريين علي نظام مبارك مش لأنه ديكتاتور لكن لأنه ديكتاتور فاسد .. كتير يؤمنوا بفكرة الديكتاتور العادل .. وأكتر عايزين دولة تعمل لهم كل حاجة .. تعليم مجاني ورعاية صحية ووظيفة وكله .. وكل ده تمنه إيه من حريتك أو كرامتك أو كده .. مش مشكلة .. ده تفكير طبقة كبيرة من المصريين مازالت عايشة في أيام دولة ناصر

ليه أنا بأقول كل ده .. أنا بس عايز أرد علي فكرة “إقتحام فكرة وزارة الدفاع” أو الداخلية اللي كل مرة المجلس العسكري ولا الحكومة يطلع يخوفنا بيها .. الشعب المصري بيحب الدولة المركزية وعايز يحافظ عليها وفكرة زي فكرة إقتحام وزارة الداخلية أو الدفاع يثير حفيظة ناس كتيرة ويراها الشعب كأنها تعدي علي الدولة المركزية اللي بتحمينا كلنا حتي لو كانت الدولة ديه عمرها ما حمتنا قبل كده

وكمان السياسيين بيقعوا في الفخ ده كل مرة بسهولة محرجة .. وتلاقي واحد زي العوا عايز يبقي ملكي أكتر من الملك ويقولك إقتحام وزارة الدفاع يعتبر خيانة عظمي .. طب والتخطيط والتستر علي قتل المصريين من جوه وزارة الدفاع مش خيانة عظمي؟؟

كل مرة المجلس العسكري يطلع علينا بالإتهام الفارغ بتاع إقتحام وزارة الدفاع ولا الداخلية.. تلاقي كل السياسيين لازم يسارعوا بالتأكيد علي إن ده عيب وحرام

إتفرج علي الفيديو اللي فوق ده بتاع منال عمر وإنت تفهم إزاي المخطط بيتفذ زي الكتاب ما بيقول

وإتفرج علي الفيديو ده بتاع عربيات الجيش وهي بتنزل بلطجية في العباسية

http://www.youtube.com/watch?v=CYF09VYJGcI&feature=player_embedded

وإعرف إن اللي بيحصل ده كله سيناريو للفوضي المنظمة .. فوضي وهوجة كبيرة تخوف بيها الناس وتخليهم يجروا علي بيوتهم يستخبوا .. إعمل خلافات وساحات للإختلاف وشق الصفوف بين القوي الوطنية والسياسية .. بدل ما تبدأ المرحلة الإنتقالية بإنك تأسس جمعية تأسيسية توافقية .. لأ إعمل إنتخابات تنافسية تخلي فيها القوي السياسية تقطع بعض علي الكراسي وبعدين إطلب منهم يعملوا جمعية تأسيسية توافقية .. إتفق في السر مع الإخوان .. وإسمح للسلفيين يعملوا أحزاب دينية صريحة رغم إن القانون بيقول عكس كده .. وإفتح صدرك للعلمانيين والليبرالبين وإعمل لهم مجلس إستشاري يسلوا فيه وقتهم ويحسوا إنهم أصحاب سلطة هم كمان .. نكل بالشباب الصغير اللي هو عماد الثورة وإقتل وإدبح وعذب وإعتقل وإظلم فيه علي قد ما تقدر وإعمل ده بعيد عن الضوء وكل فترة والتانية أظهره لللي عايز يعتبر ..

سيناريو الفوضي المنظمة ده ملهوش تاريخ نهاية صلاحية ومش عرض ينتهي بتسلم الرئيس الجديد للسلطة .. بالعكس .. خلي كده الرئيس الجديد .. حتي لو كان أكثر الرؤساء ثورية .. خليه كده يحاول يغير وزارة الداخلية بجد ولا يعيد هيكلتها .. البعبع هيرجع علي طول .. مش وقت هيكلة ده يا ريس .. خلينا نرجع الأمن الأول .. وبعدين كل مرشح دلوقتي يقولك هنرجع الأمن بعد عدد معين من الأيام .. الشعب هيصب جم غضبه علي الرئيس لما الأمن ما يرجعش بعد التاريخ ده

خلي الرئيس الجديد ده يفكر بس يفكك الدولة العميقة .. هتلاقي الأزمات الصغيرة اللي تنكد علي الناس تظهر .. مفيش أنابيب .. مفيش عيش .. حرايق .. أي بلا أزرق وخلاص .. الريس ده لازم يفضل في موقع دفاعي طول الوقت .. مش موقع هجومي

موقع رئيس الجمهورية ده عامل زي الريموت كنترول .. له كل التحكم .. بس التليفزيون (ولا أيا ما كان الجهاز) هو اللي بيحدد يستجيب ولا لأ .. ولما الجهاز لا يستجيب أول حاجة بتعملها هو إنك تقول “الريموت مش شغال” .. أول فشل للدولة هيكون سببه رئيس الجمهورية .. “أدي يا عم الثورة وصلت لرئاسة الجمهورية .. إيه اللي حصل يعني”

أنا مش عايزك تتشائم .. أنا تعبت من التشاؤم وعشت التشاؤم فترة طويلة وإكتشفت إن كل يوم الشمس لسه بتطلع ومطلوب مني إني أفضل عايش .. في الفيديو بتاع منال عمر فوق بتقول إن فيه أربع أنواع من رد الفعل .. ومنهم التبلد .. أنا لفترة كنت من المتبلدين .. قلت التبلد أحسن من التشاؤم ..

اللي في إيديك تعملوا علشان تنهي نظام مبارك بجد .. النظام اللي لسه ما إنتهاش .. النظام اللي قرر بعقل وتفكير إنه يخلص من رأسه علشان يعيش .. اللي في إيديك تعمله هو حاجتين .. إما “الإجتياح” .. أو اللي ممكن تسميه “ثورة الجياع” .. غضب لا يعرف الخوف ولا يعرف العقل ولا هدف له .. غضب شمشون .. عليا وعلي أعدائي .. والحاجة التانية هو إننا نستعيد روح يناير وظروف يناير وجو يناير علشان النظام يلاقي إنه لا أمل أمامه غير إنه يقدم تنازل كبير زي تنازل التخلي عن مبارك

فاكر لما المليونيات كانت بتجيب نتائج حقيقية .. كان فيه حاجتين مختلفتين عن دلوقتي .. أولا .. كان فيه وحدة حقيقية بين المشاركين وعلي أهداف معينة .. وثانيا .. نظام مبارك ماكنش عارف إزاي يخلي المليونية تخرج عن مسارها ..

القوي السياسية هي سبب الإنشقاق في الصف .. لما الشيوخ أخدوا المبادرة من الشباب .. لما إنتهينا من جو الثورة وإنتقلنا إلي جو السياسية .. بدأ الإنشقاق في الصف .. لما لاحت فرصة تحقيق أهداف ومصالح شخصية وجماعية وليس فقط تحقيق أهداف وطنية وثورية .. إنشق الصف .. إرجع تاني لجو الثورة .. إيه هي أهدافك؟ فين هي قايمة الأهداف اللي عايز تحققها .. سيبك من الإنتخابات والإنتقال والكلام الفارغ ده كله .. سيبك من الإعتصامات وأحداث مش عارف ومش عارف مين .. فين أهدافك؟ فين قايمة الأهداف اللي عايز تحققها .. إكتبها علي ورقة وروح لف بيها علي كل مرشحي الرئاسة وخد تعهد منهم إنهم يحققوا ده .. بدل ما تتمني إن مرشح الثورة ينجح .. إضمن إن اللي هينجح هيحقق أهداف الثورة .. كل مرشح النهارده عمال يقولك هنعمل نهضة وهنعمل صرف صحي وهنعمل مش عارف إيه .. جاتم خيبة .. حاكموا مبارك الأول .. هدوا الخرابة الأول وبعدين إبنوا القصر

إزاي المليونية ما تخرجش عن مسارها .. لازم وضوح في الرؤية قبل المليونية .. إيه هو الهدف؟ بيان واضح لإيه هو الهدف .. مليونية الجمعة اللي فاتت مش عارفين إيه هو الهدف .. وبعدين اللي بيحصل بعد المليونية هو إن المجلس العسكري بيخلي دايما الإعتصام ينتهي بمأساة وبدل ما يبقي الكلام عن المليونية أو هدفها (اللي مش واضح أصلا) بيكون الكلام عن المأساة وعن إزاي نحاكم المسئول عنها .. جاتكم خيبة .. حاكموا مبارك الأول

الحل هو إن يكون فيه وحدة في الصف ويكون فيه وضوح في الرؤية .. ثورة يناير عملها الشباب وخربها الشيوخ .. عايز وحدة في الصف .. جمع الشباب من كل التيارات وإعمل وحدة بينهم .. عايز وضوح في الرؤية .. جمع الشباب وهم يقولولك إيه الرؤية وإيه هي الأهداف

مش عايزين كيان جديد ولا حزب ولا جمعية ولا ويب سايت ولا نيلة .. عايزين حوار حقيقي .. والحوار ده ليه هدف واحد .. وحدة الصف وراء رؤية واضحة .. هدف واحد .. إستعادة زمام المبادرة

فارق أجيال

أنا بدأت المقال ده بإسلوب وبفكرة مختلفة تماما .. بدأت بكتابة قائمة بما هو المطلوب من الفترة الإنتقالية .. أنا كنت متيقن من إن المجلس العسكري لم يسئ فقط إدارة الفترة الإنتقالية وإنما دمر أشياء كتيرة في مصر وفي الثورة بالطريقة التي أدار بها الفترة الإنتقالية. كنت أشعر بإن الفترة الإنتقالية تم تأجيلها إلي فترة الرئاسة الأولي .. إن من سيتولي إدارة شئون البلاد (سواء برلمان أو رئيس) سيأخذ علي عاتقه عمل كل الأشياء التي كان من المفترض عملها في الفترة الإنتقالية .. إنهاء نظام مبارك .. رد الحقوق لأصحابها بشكل يسمح لنا بغلق صفحة الماضي للأبد وكلنا مسترحين ويسمح لنا بالتطلع للمستقبل بنفس راضية .. تخيل ما هو شكل مستقبل مصر بدون داعي للرجوع لنفس الخيارات المستهلكة التي يفرضها علينا الماضي .. الخيارات التي فشلت أو التي ليس لها علاقة بالواقع .. الخيارات التي صممت لعصر الستينات والتي يدعو لها أناس في الستينات من عمرهم أو في فكرهم. كل هذه البنود وغيرها هي ما تضمنته القائمة التي كتبتها. هذه البنود تخيلت أن من سيتولي الأمور سيقوم علي تنفيذها. لكني الآن أشك في ذلك.

الفترة الإنتقالية تحولت إلي الفترة الإنتقامية. كل القبائل إنتهزت فرصة أن “الكبير” إختفي وأخذت تدفع بكبيرها لكي يكون “الكبير الجديد” وفي الوقت نفسه بدأت تصفي حساباتها مع القبائل الأخري. في الوقت نفسه ، وقف الخلق يشاهدون التناحر وبعضهم يفسره بأنه “الديموقراطية” فأخذ الكافرون بالديموقراطية يترحمون علي أيام الحكم الراشد وأخذ أعداء الثورة يترحمون علي أيام الإستقرار وأخذ الكارهون لأنفسهم يلعنون الشعب وجهله وإختياراته الجاهلة وأخذ من تصوروا أنهم فائزون يتباهون بالديموقراطية. ووقف الغالبية العظمي من الشعب صامتا يفكر ما هي الإجابة الصحيحة لكل سؤال وما هي القبيلة الأفضل والأنسب والأحق.

هذه الثورة عملها الشباب وإستولي عليها الكبار. فيه ناس تقولك الثورة إستولي عليها المجلس العسكري ولا الفلول .. فيه ناس تقولك الإخوان إستفادوا من الثورة ديه علي حساب الثوار .. كل ديه مظاهر .. الحقيقة هي إن فيه جيل عمل الثورة وجيل إستولي عليها منه.

جيل مازال عايش في صراعات الستينات والسبعينات .. صراعات الأديولوجيات وحلم الصمود والتصدي للإستعمار .. جيل بيتكلم بلسان القائد الملهم وهو ولا قائد ولا ملهم .. جيل فاكر إنه لسه يقدر يسيطر علي الحقيقة ويحدد إيه هي .. جيل مش فاهم التكنولوجيا ولا العولمة ولا إزاي العالم قرية صغيرة .. جيل عنده إجابات لأسئلة راحت وجت أسئلة تانية بدلا منها.

الجيل ده أغلبه في الستينات من عمرها لكن بعضهم في الستينات في فكرها .. شباب صغير كبر وشاف الدنيا اللي حوليه كده وشاف طريقه في إنه يسمع الكلام ويمشي ورا الكبار وفي يوم من الأيام هيسمحوا له إنه يبقي زيهم.

هي ديه المشكلة الحقيقية.

بكره لينا .. لكن إحنا فين وبكره فين .. طريق طويل وعلي مدار الطريق ده .. إحنا هنتغير .. ومين عارف يمكن نبقي الجيل اللي يقف في طريق جيل الشباب اللي جاي بعدنا .. أكيد الشباب اللي وسطنا اللي ستينات في فكرهم دول هيقفوا في طريق الجيل اللي جاي بعدنا .. لكن القلق علي بكره مش وقته دلوقتي .. المطلوب دلوقتي هو القلق علي النهارده .. السؤال هو إزاي الجيل اللي عمل الثورة يقدر إنه يمارس أفكاره .. إزاي نقدر نتخطي الخيارات المطروحة .. إزاي ندور علي الأسئلة الصحيحة .. إزاي أقدر أكتب فكرة علي الورق بدون ما الصوت اللي في دماغي يقعد يقول “إحلم زي ما إنت عايز .. كل ده عمره ما هيتحقق”.